
Serikali ya Umoja wa Kitaifa ya Libya pamoja na Kamati ya Mambo ya Nje na Ushirikiano wa Kimataifa ya Baraza la Wawakilishi, siku ya Jumapili zilipinga vikali kauli zilizotolewa hivi karibuni na Rais wa Marekani Donald Trump, zikisema kuwa heshima ya Libya na watu wake haipaswi kutumiwa kama nyenzo katika mijadala ya uchaguzi.
Waziri Mkuu wa Libya Abdul-Hamid Dbeibah, alisema katika taarifa yake kuwa Libya inakataa dharau yoyote inayoelekezwa kwa nchi hiyo au watu wake—ambao wamejitolea sana katika kupambana na ugaidi—akisisitiza kuwa uhusiano na Marekani lazima ujengwe juu ya msingi wa kuheshimiana na maslahi ya pamoja.
Kamati hiyo ya bunge imeitaka serikali ya Marekani itoe “ufafanuzi rasmi kuhusiana na kauli hizo,” ikisisitiza kuwa Libya ni “nchi huru yenye historia ya kale na urithi uliosheheni wa kitamaduni, ambayo haiwezi kudogoshwa kwa maelezo ya muda mfupi au hukumu zinazotolewa kabla ya uchunguzi.”
Mwitikio huo mkali umekuja kufuatia kauli zilizotolewa na Trump siku ya Jumamosi katika mkutano wa kampeni huko Georgia, ambapo alikosoa sera za uhamiaji na kuzitaja Libya, Yemen, Haiti, na Somalia kama nchi alizozielezea kuwa “zimejaa ugaidi.” Kauli hizo zilizua lawama kali kutoka pande mbalimbali za kisiasa na miongoni mwa umma nchini Libya.